বিহুৰ পূৰ্বে যোৰহাটবাসীলৈ দুটাকৈ ভাল খবৰ! উপহাৰৰ টোপোলা লৈ ৪ এপ্ৰিলত যোৰহাটলৈ মুখ্যমন্ত্ৰী

যোৰহাট নগৰৰ বহু প্ৰতীক্ষিত দ্বিতীয় ৰে’লৱে অভাৰব্ৰীজ নিৰ্মাণ সম্পূৰ্ণ হৈছে। কে.বি. ৰোডত, যোৰহাট চিকিৎসা মহাবিদ্যালয়ৰ সমীপত নিৰ্মিত ৫৮১.২০৫ মিটাৰ দৈৰ্ঘৰ এই দু’লেন যুক্ত উৰণ সেঁতু অহা ৪ এপ্ৰিলত মুখ্যমন্ত্ৰী ড. হিমন্ত বিশ্ব শৰ্মাই উদ্বোধন কৰিব।

উৰণ সেঁতুৰ মূল ৰেলৱে অংশৰ দৈৰ্ঘ্য ৭৪ মিটাৰ, আৰু এই প্ৰকল্পৰ মুঠ অনুমোদিত ব্যয় ৭৮.২৭ কোটি টকা। ৰাজ্য চৰকাৰ আৰু ৰে’ল বিভাগে সমানে নিৰ্মাণ ব্যয় বহন কৰিছে।

উৰণ সেঁতুখনৰ সম্পূৰ্ণতা লাভৰ ফলত যোৰহাট নগৰৰ যান-বাহন পৰিবহন অধিক সুচল হ’ব। বিশেষকৈ নতুনকৈ নিৰ্মিত কমাৰবন্ধা পথৰে যাতায়াত সুগম হোৱাৰ সম্ভাৱনা

আনহাতে অহা ৪ এপ্ৰিলত মুখ্যমন্ত্ৰীয়ে যোৰহাটৰ চিনামৰাত নিৰ্মাণ কৰা অত্যাধুনিক কনভেনছন চেণ্টাৰটো মুকলি কৰিব। এই অত্যাধুনিক কনভেনছন চেণ্টাৰত যিকোনো ধৰণৰ উচ্চ পৰ্যায়ৰ বৈঠক, আলোচনা চক্ৰ অনুষ্ঠিত কৰিব পৰাৰ সুবিধা আছে।

আনহাতে যোৰহাটৰ চিনামৰাত নিৰ্মাণ কৰি থকা তৃতীয়খন ৰে’লৱে অভাৰ ব্ৰীজৰ নিৰ্মাণ দ্ৰুত গতিত আগবাঢ়িছে আৰু নিৰ্ধাৰিত সময়ৰ বহু পূৰ্বেই ২০২৫ৰ ডিচেম্বৰৰ ভিতৰতে এই উৰণ সেঁতুখনৰ নিৰ্মাণ সম্পূৰ্ণ হোৱাৰ পূৰ্ণ সম্ভাৱনা আছে। এই ৰে’লৱে অভাৰ ব্ৰীজখনৰ ফাউণ্ডেশ্যন আৰু ছাবষ্ট্ৰাকছাৰৰ কাম ইতিমধ্যে প্ৰায় সম্পূৰ্ণ হৈছে। কলকতাত নিৰ্মাণ কৰি থকা উৰণ সেঁতুখনৰ ষ্টীল ফেব্ৰিকেশ্যনৰ নিৰ্মাণৰ কামো ইতিমধ্যে সম্পূৰ্ণ হৈছে। এই উৰণ সেঁতুখনৰ নিৰ্মাণ সম্পূৰ্ণ কৰাৰ নিৰ্ধাৰিত সময় আছিল ২০২৬ ৰ মে’।

আনহাতে যোৰহাট নগৰৰ এ টি ৰোডৰ এক কিলোমিটাৰতকৈ অধিক দৈৰ্ঘৰ উৰণ সেতঁতুখনৰ নিৰ্মাণৰ কামো দিনে নিশাই অব্যাহত আছে। আৰু এই উৰণ সেঁতুখনৰ নিৰ্মাণো নিৰ্ধাৰিত সময়ৰ বহু পূৰ্বে এই বছৰৰ ডিচেম্বৰৰ ভিতৰত সম্পূৰ্ণ হৈ উঠাৰ সম্ভাৱনা ব্যক্ত কৰিছে বিভাগীয় অভিযন্তাই। এ টি ৰোডৰ উৰণ সেঁতুখনৰ নিৰ্মাণ সম্পূৰ্ণ কৰাৰ নিৰ্ধাৰিত সময় হৈছে ২০২৬ চনৰ ছেপ্তেম্বৰ ।