আমেৰিকাই জিম্বাবৱেৰ বাবে বেছিভাগ ভিছা সেৱা স্থগিত কৰিছে

যুক্তৰাষ্ট্ৰই জিম্বাবৱেৰ নাগৰিকসকলৰ বাবে সাধাৰণ ভিছা সেৱা সাময়িকভাৱে স্থগিত কৰাৰ ঘোষণা দিছে। এই সিদ্ধান্ত শুকুৰবাৰৰ পৰা কাৰ্যকৰী হ’ব বুলি আমেৰিকাৰ ষ্টেট ডিপাৰ্টমেণ্টে জনাইছে। যুক্তৰাষ্ট্ৰৰ জিম্বাবৱে থকা দূতাবাসৰ মতে, এই স্থগিতাদেশ হৈছে জিম্বাবৱে চৰকাৰৰ সৈতে চলি থকা উদ্বেগ সমাধানৰ অংশ আৰু ভিছাৰ অপব্যৱহাৰ আৰু অধিক সময় থাকি যোৱা ৰোধ কৰিবলৈ ট্ৰাম্প প্রশাসনৰ এক প্ৰচেষ্টা। যদিও, কুটনৈতিক আৰু চৰকাৰী ভিছাসমূহ এই স্থগিতাদেশৰ পৰা অৱ্যাহত থাকিব।

এই পদক্ষেপটো ড’নাল্ড ট্ৰাম্পৰ সময়চোৱাৰ অভিবাসন নীতিৰ অংশ, য’ত যুক্তৰাষ্ট্ৰে আফ্ৰিকাৰ কেইবাটাও দেশৰ ওপৰত কঠোৰ নিয়ম আৰোপ কৰিছে। জুন মাহত, যুক্তৰাষ্ট্ৰে ১২ খন দেশৰ নাগৰিকৰ ওপৰত ভ্ৰমণ নিষেধাজ্ঞা আৰোপ কৰে, যাৰ ভিতৰত ৭ খন দেশ আফ্ৰিকাত অৱস্থিত। এই নিষেধাজ্ঞা পৰৱৰ্তী সময়ত ৭ খন আন দেশলৈ বৃদ্ধি কৰা হয়, যাৰ ৩ খনো আফ্ৰিকান দেশ।

তদুপৰি, যুক্তৰাষ্ট্ৰে ৩৬ খন দেশৰ পৰা ভ্ৰমণকাৰীসকলৰ বাবে কঠোৰ পৰীক্ষা আৰু নথিপত্ৰ যাচাই ব্যৱস্থা গ্ৰহণ কৰিবলৈ দাবী কৰিছে। এই ৩৬ খন দেশৰ অধিকাংশ আফ্ৰিকাত অৱস্থিত। জিম্বাবৱে, মালাৱি আৰু জাম্বিয়া এই তালিকাত অন্তৰ্ভুক্ত দেশ, যাক নিজৰ নাগৰিকসকলৰ ভ্ৰমণ নথিপত্ৰ উন্নত কৰা আৰু যুক্তৰাষ্ট্ৰত অবৈধভাৱে থকা নাগৰিকসকলৰ স্থিতি সমাধান কৰিবলৈ কোৱা হৈছে।

যুক্তৰাষ্ট্ৰৰ ষ্টেট ডিপাৰ্টমেণ্টে কৈছে যে এই সকলো পদক্ষেপ ৰাষ্ট্ৰীয় সুৰক্ষা আৰু জনসাধাৰণৰ সুৰক্ষাৰ বাবে লোৱা হৈছে। তেওঁলোকে কয় যে, ট্ৰাম্প প্রশাসনে আমেৰিকাৰ ভিছা প্ৰক্ৰিয়াৰ জৰিয়তে উচ্চতম সুৰক্ষা মান বজাই ৰাখিবলৈ প্ৰতিশ্ৰুতিবদ্ধ।

এই ঘোষণা কয়দিন আগতে আহে, যেতিয়া যুক্তৰাষ্ট্ৰে মালাৱি আৰু জাম্বিয়াৰ নাগৰিকসকলৰ বাবে এটা পাইলট ভিছা বণ্ড প্ৰকল্প আৰম্ভ কৰাৰ কথা ঘোষণা কৰে। এই নীতিত, যি কোনো ব্যক্তি যুক্তৰাষ্ট্ৰলৈ পৰ্যটন বা ব্যৱসায়িক ভিছাৰ বাবে আবেদন কৰে, তেওঁলোকে $৫,০০০, $১০,০০০ বা $১৫,০০০ পৰ্যন্ত বণ্ড জমা দিব লাগিব। যদিহে ভিছাৰ সময়ছোৱাত তেওঁলোকে যুক্তৰাষ্ট্ৰ এৰি যায়, তেন্তে বণ্ডটো উভতাই দিয়া হ’ব; কিন্তু অধিক সময় থাকিলে সেই বণ্ড জব্দ কৰা হ’ব।

এই নতুন নীতি ২০ আগষ্টৰ পৰা কাৰ্যকৰী হ’ব বুলি ষ্টেট ডিপাৰ্টমেণ্টে জানিবলৈ দিছে। লগতে, এই বণ্ড নীতিৰ অধীনত থকা নাগৰিকসকলে কেৱল তিনিটা নিৰ্দিষ্ট বিমানবন্দৰ—বষ্টনৰ ল’গান ইণ্টাৰনেচনেল, নিউ ইয়ৰ্কৰ জন এফ কেনেডি ইণ্টাৰনেচনেল, আৰু ৱাছিংটনৰ কাষৰ ডালেছ ইণ্টাৰনেচনেল বিমানবন্দৰতহে প্ৰবেশ আৰু প্ৰস্থান কৰিব লাগিব।

এই সকলো নীতি আৰু পদক্ষেপে যুক্তৰাষ্ট্ৰৰ আফ্ৰিকান দেশসমূহৰ প্ৰতি অভিবাসন নীতি কঠোৰ কৰা দৰ্শায়। অভিবাসন নিয়ন্ত্ৰণ আৰু সীমান্ত সুৰক্ষা নিশ্চিত কৰিবলৈ এই নীতিসমূহ প্ৰণয়ন কৰা হৈছে বুলি যুক্তৰাষ্ট্ৰ চৰকাৰে জনাইছে।