৫৫ বছৰীয়া নেপালি পৰ্বতাৰোহী কামি ৰিতা শেৰ্পাই নিজৰেই গঢ়া বিশ্ব ৰেকৰ্ড ভঙ কৰি ৩১তমবাৰৰ বাবে মাউণ্ট এভাৰেষ্ট আৰোহণ কৰি ইতিহাস গঢ়িছে। “এভাৰেষ্ট মেন” নামেৰে খ্যাত কামি ৰিতাই মঙলবাৰে পৃথিৱীৰ সৰ্বোচ্চ শৃংগত উঠি তেওঁৰ অভূতপূৰ্ব পৰ্বতাৰোহণ যাত্ৰা অব্যাহত ৰাখে। তেওঁ দক্ষিণ-পূব ৰিজ ৰুটৰ জৰিয়তে শৃংগত উপনীত হৈছিল, য’ত তেওঁ ২২ জনীয়া ভাৰতীয় সেনা দলৰ গাইড হিচাপে কাম কৰিছিল আৰু তেওঁক সহায় কৰিছিল ২৭ জন শেৰ্পাই।
এই অসাধাৰণ সফলতাৰ বাবে নেপাল তথা বিশ্ব পৰ্বতাৰোহণ মহলত ৰিতাক বহুলভাৱে অভিনন্দন জনোৱা হৈছে। এক্সপিডিচন সংস্থা Seven Summit Treks-এ তেওঁৰ ৩১তম আৰোহণক “ইতিহাসত সকলোতকৈ বেছি বাৰ এভাৰেষ্ট আৰোহণ কৰা ব্যক্তি” হিচাপে কৃতিত্ব দিয়াৰ লগতে তেওঁক এটা জীৱন্ত কিংবদন্তী বুলি অভিহিত কৰিছে। সংস্থাটোৰ এজন ডাইৰেক্টৰে জাননী দিয়ে যে ৰিতা মঙলবাৰে সুস্থভাৱে তলৰ শিৱিৰলৈ নামি আহি আছিল।
শেৰ্পা পৰিয়ালত জন্ম গ্ৰহণ কৰা কামি ৰিতা এগৰাকী পৰ্বতাৰোহী গাইডৰ পুত্ৰ। ১৯৯৪ চনত তেওঁ প্ৰথমবাৰৰ বাবে এভাৰেষ্ট আৰোহণ কৰিছিল, আৰু তাৰপৰ পৰিবেশ বা নিৰাপত্তাজনিত কাৰণত পাহাৰ বন্ধ থকা বছৰবোৰ বাদ দি প্ৰায় প্ৰতিবছৰে তেওঁ শৃংগত উঠি আহিছে। নিজৰ ৰেকৰ্ডৰ বিষয়ে ৰিতা বিশেষ উৎসাহিত নহ’লেও, তেওঁ এক সাক্ষাৎকাৰত কয় যে তেওঁ মাথোন নিজৰ কাম কৰি আছে। “মই ৰেকৰ্ডৰ বাবে খুশি, কিন্তু ৰেকৰ্ড এবেলি ভঙ হয়েই। মোৰ সঁচা আনন্দ এই যে, মোৰ আৰোহণসমূহে নেপালক বিশ্বজুৰি পৰিচিত কৰি তুলিছে।”
এভাৰেষ্টত দ্বিতীয় সৰ্বাধিক আৰোহণকাৰী শেৰ্পাজন হৈছে পাছাং দাৱা, যিয়ে এতিয়ালৈকে ২৯বাৰ শৃংগত উঠিছে। এই দুয়ো জনৰ মাজত কেৱল বন্ধুত্বসুলভ প্ৰতিযোগিতা নহয়, সেয়া হৈছে শেৰ্পা সমাজৰ সাহসিকতাৰ নিদৰ্শন।
নেপাল চৰকাৰৰ পৰ্বতাৰোহণ আৰু দুৰ্গম অভিযান শাখাৰ ডাইৰেক্টৰ হিমাল গৌতমে কৈছে যে কামি ৰিতাৰ এই অভূতপূৰ্ব সফলতাই নেপালৰ পৰ্বতৰ ভ্ৰমণ শিল্পক এক নতুন উচ্চতালৈ লৈ গৈছে।
মাউণ্ট এভাৰেষ্ট, যাৰ উচ্চতা ৮,৮৪৯ মিটাৰ (২৯,০৩২ ফুট), প্ৰথমবাৰৰ বাবে ১৯৫৩ চনত এডমাণ্ড হিলাৰী আৰু শেৰ্পা তেনজিং নৰগে দ্বাৰা আৰোহণ কৰা হৈছিল। তাৰপৰ লৈ এতিয়ালৈকে ৮,০০০তকৈ অধিক লোক এই শৃংগত উঠিছে। যদিও এতিয়া পৰ্বতৰোহন বহুত বিখ্যাত হৈ পৰিছে, তথাপিও এভাৰেষ্ট আৰোহণ এখন অতি বিপদজনক আৰু কষ্টসাধ্য অভিযান।
৩১বাৰৰ এই শৃংগাৰোহণ কেৱল কামি ৰিতাৰ ব্যক্তিগত দৃঢ়তা আৰু সাহসিকতাৰ প্ৰমাণ নহয়, ই শেৰ্পা সমাজৰ যুগজীয়াকৈ পৰ্বতৰোহনত আগবঢ়োৱা অৱদানৰ এক উজ্জ্বল দৃষ্টান্ত।
