কেবিনেট সচিবালয়ে এক গেজেট অধিসূচনা জাৰি কৰি প্ৰাক্তন অগ্নিবীৰসকলৰ সেৱা-সমাপ্তিৰ পিছত তেওঁলোকৰ পেচাগত উন্নয়নৰ বাবে কাৰ্যকলাপ সমন্বয় কৰাৰ দায়িত্ব গৃহ মন্ত্ৰণালয়ক দিছে। এই প্ৰশাসনিক ব্যৱস্থাটো ১৯৬১ চনৰ Allocation of Business Rules (কাৰ্যবণ্টন বিধি)-ত সংশোধন আনিৰে কৰা হৈছে, য’ত গৃহ মন্ত্ৰণালয়ৰ অন্তৰ্গত ৰাজ্য বিভাগৰ অধীনত এটা নতুন বিষয় অন্তৰ্ভুক্ত কৰা হৈছে। এই সংশোধনে প্ৰাক্তন অগ্নিবীৰসকলক অসামৰিক ক্ষেত্ৰলৈ সফলভাৱে স্থানান্তৰ কৰাৰ চৰকাৰী উদ্যমৰ গতি অধিক দৃঢ় কৰিছে।
২০২২ চনৰ জুন মাহত আৰম্ভ হোৱা অগ্নিপথ নিযুক্তি আঁচনিটো ভাৰতীয় সেনা, নৌসেনা আৰু বায়ু সেনাৰ আধুনিকীকৰণৰ এক গুৰত্বপূৰ্ণ পদক্ষেপ। এই আঁচনিয়ে ১৭.৫ ৰ পৰা ২১ বছৰ বয়সৰ তরুণ-তরুণীক ৪ বছৰৰ বাবে “অগ্নিবীৰ” হিচাপে নিযুক্তি দিয়াৰ ব্যৱস্থা কৰিছে। এই সময়ছোৱাৰ অন্তত কেৱল ২৫% অগ্নিবীৰক বাচি লৈ ১৫ বছৰৰ নিয়মীয়া সেৱাত অন্তর্ভুক্ত কৰা হয়।
এই অস্থায়ী সামৰিক সেৱাৰ অন্তত, অগ্নিবীৰসকলৰ বাবে অসামৰিক খণ্ডত চাকৰি লাভৰ সুযোগ প্ৰসাৰিত কৰিবলৈ চৰকাৰে বহু গুৰুত্বপূৰ্ণ পদক্ষেপ গ্ৰহণ কৰিছে। তাৰ ভিতৰত, কেন্দ্ৰীয় সশস্ত্ৰ আৰক্ষী বাহিনীত (CAPF) – যেনে CRPF, BSF, CISF, SSB আদিত – নিযুক্তিৰ ক্ষেত্ৰত ১০% সংৰক্ষণ আগবঢ়োৱা হৈছে। এই বাহিনীবোৰত মুঠ প্ৰায় ১১ লাখ কৰ্মচাৰী নিযুক্ত, যাৰ ফলত এই পদক্ষেপত গুৰুত্বপূৰ্ণ সম্ভাৱনা আছে।
ইয়াৰ উপৰিও, প্ৰাক্তন অগ্নিবীৰসকলক নতুনকৈ দেহতত্ব পৰীক্ষা (physical test) দিব লগা নহ’ব, কাৰণ তেওঁলোকে সেনাৰ অন্তৰ্গত থাকোঁতেই এই পৰীক্ষাত উত্তীৰ্ণ হৈছে। তেওঁলোকে কেৱল এজন প্ৰমাণিত চিকিৎসকৰ পৰা প্ৰাপ্ত শাৰীৰিক সক্ষমতাৰ প্ৰমাণপত্ৰ দেখুৱাব লাগিব। এই ব্যৱস্থাই নিযুক্তিৰ সময় বচাব আৰু প্ৰক্ৰিয়া অধিক দ্ৰুত কৰি তুলিব।
CAPF বাহিনীৰ বাহিৰেও, বহুতো কেন্দ্ৰীয় মন্ত্ৰণালয়, বিভাগ আৰু চৰকাৰী প্ৰতিষ্ঠানে আগন্তুক সময়ত প্ৰাক্তন অগ্নিবীৰসকলক নিযুক্তি দিয়াৰ কথা ঘোষণা কৰিছে। এইবোৰ ব্যৱস্থাই অগ্নিবীৰসকলক অসমরিক খণ্ডলৈ এক সুসংগঠিত ৰূপত স্থানান্তৰ ঘটাবলৈ সহায় কৰিব।
এই গেজেট অধিসূচনাই অগ্নিবীৰ আঁচনিটোক কেৱল সেনাৰ আধুনিকীকৰণৰ দিশে নহয়, বৰং ৰাষ্ট্ৰ গঠন তথা নিয়মানুবর্তিতা, প্ৰশিক্ষণ আৰু পেচাগত নৈতিকতাৰ বাবে এটা গুৰুত্বপূৰ্ণ পদক্ষেপ হিচাপে দৃঢ় কৰি তুলিছে। সেনাত শিকি অহা শৃংখলা, দলগততা আৰু আত্মনিয়মৰ গুণাবলীয়ে তেওঁলোকক অসামৰিক খণ্ডতো সফলতা লাভ কৰাত সহায় কৰিব
