জি৭ শীৰ্ষ সম্মিলনৰ আউটৰিচ ছেছনত ভাৰতৰ প্ৰধানমন্ত্ৰী নৰেন্দ্ৰ মোদীয়ে তীব্ৰভাৱে সন্ত্রাসবাদৰ বিৰুদ্ধে মত প্ৰকাশ কৰে। তেওঁ ক'লে যে যিসকল ৰাষ্ট্ৰে খোলাখুলি ভাবে সন্ত্রাসবাদক সমৰ্থন দিয়ে, তেওঁলোকক এতিয়াও পুৰস্কৃত কৰা হৈছে, আৰু কেৱল নিজৰ স্বাৰ্থৰ বাবে সন্ত্রাসবাদক উপেক্ষা কৰা মানৱতাৰ সৈতে এক ধোঁকা। তেওঁ পশ্চিমাদেশ, বিশেষকৈ আমেৰিকাৰ পাকিস্তানৰ সৈতে থকা সম্পৰ্কলৈ ইঙ্গিত দি কয় যে ই এক দ্বৈত মানদণ্ডৰ নিদৰ্শন।
মোদীয়ে উপস্থিত নেতাসকলক প্ৰশ্ন কৰিলে, “আমিৰা সঁচাকৈয়ে সন্ত্রাসবাদৰ বিৰুদ্ধে গম্ভীৰ নে? আমি কেৱল তেতিয়াহে সন্ত্রাসৰ অৰ্থ বুজিম নে, যেতিয়া সেই সন্ত্রাস আমাৰ দুৱাৰত আহি উপস্থিত হয়?” তেওঁ গ্লোবেল সংস্থাসমূহৰ বিশ্বাসযোগ্যতাৰ বিষয়ে আশঙ্কা প্ৰকাশ কৰি কয় যে, সন্ত্রাসবাদী আৰু ভুক্তভোগীসকলক একেই মানদণ্ডত মাপি চোৱা অনুচিত।
তেওঁ উল্লেখ কৰিলে যে একে সময়তে কিছু ৰাষ্ট্ৰে নিজৰ ৰুচি আৰু স্বাৰ্থ অনুসৰি কঠোৰ নিষেধাজ্ঞা আৰোপ কৰে, আনহাতে যিসকল ৰাষ্ট্ৰে সন্ত্রাসবাদক সমৰ্থন দিয়ে, তেওঁলোকক উল্টো লাভ দিয়া হয়। এই বক্তব্য দি তেওঁ আমেৰিকাত পাকিস্তান সেনাপ্ৰধান আসিম মুনীৰক ৰাষ্ট্ৰপতি ড'নাল্ড ট্ৰাম্পে অভ্যৰ্থনা দিয়া ঘটনাৰ দিশে ইঙ্গিত কৰে।
মোদীয়ে কয়, “যদি আমি আজি দৃঢ় পদক্ষেপ নলওঁ, তেন্তে ইতিহাসে আমাক কেতিয়াও ক্ষমা নকৰিব।” তেওঁ কয়, সন্ত্রাসবাদ বা সন্ত্রাসবাদীক সমৰ্থন কৰা মানে হৈছে সমগ্ৰ মানৱতাৰ ওপৰত এক আঘাত।
মোদীয়ে ২২ এপ্ৰিল পহেলগামত সংঘটিত নৃশংস সন্ত্রাসবাদী আক্ৰমণৰ উল্লেখ কৰি কয় যে, এই আক্ৰমণ কেৱল এক অঞ্চলৰ ওপৰত নহয়, সমগ্ৰ ভাৰতৰ আত্মা, পৰিচয় আৰু গৰিমাৰ ওপৰত প্ৰচণ্ড আঘাত। তেওঁ যিসকল ৰাষ্ট্ৰে এই আক্ৰমণৰ নিন্দা কৰিছিল, তেওঁলোকক কৃতজ্ঞতা জ্ঞাপন কৰে।
সন্ত্রাসবাদৰ বিৰুদ্ধে সকলো ৰাষ্ট্ৰে একত্ৰিত হৈ লড়াৰ আহ্বান জনাই তেওঁ কয়, “আমাৰ প্রতিবেশী অঞ্চল সন্ত্রাসৰ আঁতুৰঘৰ হৈ পৰিছে। গ্লোবেল শান্তি আৰু উন্নয়নৰ বাবে আমাৰ নীতি আৰু চিন্তাধাৰা স্পষ্ট হওঁক — যিসকলে সন্ত্রাসবাদক সমৰ্থন কৰে, তেওঁলোকক দায়ী কৰি শাস্তি দিয়া হ’ব লাগিব।”
তেওঁ কানাডাৰ প্ৰধানমন্ত্ৰী মাৰ্ক কাৰ্নিক ধন্যবাদ জনাই এই জি৭ শীৰ্ষ বৈঠকালৈ আমন্ত্ৰণ জনোৱাৰ বাবে কৃতজ্ঞতা প্ৰকাশ কৰে।
জি৭ হৈছে বিশ্বৰ আটাইতকৈ উন্নত অৰ্থনীতিৰ অ-আধিকাৰিক গোট — ফ্ৰান্স, আমেৰিকা, ব্ৰিটেইন, জাৰ্মানী, জাপান, ইটালী আৰু কানাডা আৰু ইউৰোপীয় সংঘ — যিসকল বছৰি একেলগে মিলিত হয়। যদিও ভাৰত জি৭ৰ সদস্য নহয়, তথাপিও ভাৰতৰ প্ৰধানমন্ত্ৰীয়ে পূৰ্বতেও বহুবাৰ আউটৰিচ ছেছনত অংশ গ্ৰহণ কৰিছে। এইবাৰ আছিল ভাৰতৰ ১২তম আৰু মোদীৰ ৬তম অংশগ্ৰহণ।
সন্ত্রাসবাদৰ বাহিৰেও, মোদীয়ে আন আন্তঃৰাষ্ট্ৰীয় বিষয়বোৰতো মত প্ৰকাশ কৰে। তেওঁৰ বক্তব্যত গ্লোবেল সুৰক্ষা, নৈতিকতা আৰু সংহতিৰ ওপৰত ভাৰতৰ দৃঢ় স্থিতি প্ৰকাশ পাইছিল।
