মাৰ্ক জুকাৰবাৰ্গৰ ডাঙৰ AI পদক্ষেপ — শীৰ্ষ প্ৰতিভা আকৰ্ষণ কৰিবলৈ ₹৮৬০ কোটি দৰমহাৰ প্ৰস্তাৱ
:
| Updated On: 25-Jun-2025 @ 2:53 pmSHARE
মেটাৰ মুখ্য কাৰ্যবাহী অধিকাৰী (CEO) মাৰ্ক জাকারবাৰ্গ এআই (Artificial Intelligence) ক্ষেত্ৰত শীৰ্ষ প্ৰতিভাৰ এক দলেৰে শুদ্ধ প্ৰযুক্তি গঢ়ি তুলিবলৈ ব্যক্তিগতভাৱে আগবাঢ়ি আহিছে। Wall Street Journal-ৰ এক প্ৰতিবেদন অনুসৰি, জাকারবাৰ্গে বিশ্বজুৰি শীৰ্ষস্থানীয় গৱেষক, ডেভেলপাৰ আৰু উদ্যোগীৰ সৈতে পোনপটীয়াকৈ যোগাযোগ কৰি আছে, য’ত তেওঁলোকক ১০০ মিলিয়ন ডলাৰ (প্ৰায় ₹৮৬০ কোটি) পৰ্যন্ত আকাশচুম্বী পেকেজৰ প্ৰস্তাৱ দিছে। তেওঁৰ লক্ষ্য হৈছে মেটাৰ অধীনত এখন নতুন “Superintelligence” লেব স্থাপন কৰা।
এই নিযুক্তিৰ প্ৰচেষ্টাটো একেবাৰে ব্যক্তিগত। জাকারবাৰ্গে বহু প্ৰতিভাশালী ব্যক্তিক ই-মেইল আৰু হোৱাটছএপযোগে পোনপটীয়াকৈ যোগাযোগ কৰিছে। বহুতেই প্ৰথমতে ভাবিছিল যে এই বাৰ্তাবোৰ নকল। এটা ক্ষেত্ৰত, মেটাই এটা ষ্টাৰ্টআপ ক্ৰয় কৰাৰ প্ৰস্তাৱ দিছিল কেৱল তাৰ টীমক অন্তর্ভুক্ত কৰিবলৈ। আন এটা ক্ষেত্ৰত, জাকারবাৰ্গে Scale AI নামৰ এখন ষ্টাৰ্টআপৰ CEO-জনক নিযুক্ত কৰিবলৈ ১৪ বিলিয়ন ডলাৰৰো অধিক খৰচ কৰিছে বুলি জনা গৈছে।
এই নিযুক্তিসমূহ সাধাৰণ নিযুক্তি নহয়। ১০০ মিলিয়ন ডলাৰৰ পেকেজৰ অফাৰ এই নিযুক্তিসমূহক ইতিহাসৰ আটাইতকৈ দামী প্ৰযুক্তি নিযুক্তিত পৰিণত কৰিছে। কিন্তু ইয়াৰ পাছতো সকলো প্ৰস্তুত নহয়। মেটাৰ এআই দিশ, নেতৃত্ব আৰু গঠন সন্দর্ভত ধোঁৱাশাৰ বাবে বহুজনেই অমনা হৈছে। বহু অভ্যন্তৰীণ পুনৰগঠন ঘটাৰ ফলত নেতৃত্ব কাক বুলি চিহ্নিত কৰা কঠিন হৈ পৰিছে।
আৰু এটা মূল কারণ হৈছে মেটাৰ মুখ্য এআই বিজ্ঞানী ইয়ান লে’কুনৰ দৃষ্টিভংগী। অধিকাংশ কোম্পানী য’ত বৃহৎ ভাষা মডেল (LLM)-ৰ মাধ্যমে সুপারহিউমেন এআই-ৰ লক্ষ্য লৈ আগবাঢ়িছে, তাত লে’কুন এই পথটো সঠিক বুলি নাভাবেই। এই মতভেদৰ ফলত বহুজনেই যোগদান কৰাৰ ক্ষেত্ৰত ভাবি চাবলৈ বাধ্য হৈছে।
তথাপি, জাকারবাৰ্গ বৰ ধেমালিত আগবাঢ়িছে। তেওঁ “Recruiting Party” নামৰ এখন হোৱাটছএপ গোটৰ অংশ, য’ত মেটাৰ শীৰ্ষ মানৱ সম্পদ বিষয়া সকলে থাকি নিযুক্তি সম্পৰ্কীয় পৰিকল্পনা কৰে। কোনো এজন সম্ভাব্য প্ৰাৰ্থী পছন্দ হ’লে, জাকারবাৰ্গে নিজৰ পৰা প্ৰথমে বাৰ্তা পঠিয়ায়। প্ৰতিক্ৰিয়া অনুকূল হ’লে তেওঁ ব্যক্তিগত বৈঠকৰ বাবে আমন্ত্ৰণ দিয়ে, কেতিয়াবা নিজৰ Palo Alto বা Lake Tahoe ৰ ঘৰতো।
তেওঁ স্পষ্টকৈ কৈছে—সাধনসামগ্ৰী বা বাজেটৰ কোনো সমস্যা নহ’ব। বিজ্ঞাপন ৰেভিনিউ আৰু এআই চিপৰ প্ৰচুৰতা থাকোঁতে, জাকারবাৰ্গে বিশ্বাস কৰে যে মেটাই উন্নতমানৰ এআই প্ৰযুক্তি নিৰ্মাণৰ ক্ষেত্ৰত আটাইতকৈ উত্তম ঠাই হব।
আনহাতে, OpenAI-ৰ দৰে প্ৰতিদ্বন্দ্বী কোম্পানীসমূহেও নিজৰ প্ৰতিভা ধৰি ৰাখিবলৈ তৎপৰ। OpenAI CEO ছেম অল্টমানে কৈছে—“আমাৰ শীৰ্ষ দলেৰে এতিয়ালৈকে কোনোবাই মেটালৈ যোৱা নাই।” এই বক্তব্যই প্ৰতিভাৰ বাবে চলি থকা তীব্ৰ প্ৰতিযোগিতাক স্পষ্ট কৰে।