পৰিবহন বিভাগে গাড়ীৰ মালিকৰ ঘৰুৱা আৰু কাৰ্যালয়স্থানলৈ যাত্ৰা কৰি গাড়ী সম্পর্কীয় নথিপত্ৰৰ সমস্যা সমাধান, ড্ৰাইভিং লাইচেঞ্চ সেৱা, কৰ সংগ্ৰহ আৰু অন্যান্য গুৰুত্বপূর্ণ সেৱা আগবঢ়াবলৈ দৰজালগা সেৱা আৰম্ভ কৰিছে। পৰিবহন বিভাগৰ বিশেষ দায়িত্বত নিযুক্ত বিষয়া আৰু জিলা পৰিবহন বিষয়াগৌতম দাসৰ পৰ্যবেক্ষণত এই অভিযান চলি আছে। এই অভিযানৰ জৰিয়তে বিলাসবহুল আৰু বহুজাতিক কোম্পানিৰ মালিকানাধীন যিসকল গাড়ীৰ নথিপত্ৰ এতিয়াও সঠিক নহয়, তেওঁলোককো লক্ষ্য কৰা হৈছে।
দাসে কয় যে যাত্ৰীৰ আৰু চালকৰ সুৰক্ষাৰ বাবে সঠিক নথিপত্ৰ অত্যন্ত প্ৰয়োজনীয়। “বৈধ নথিপত্ৰ যিকোনো গাড়ীৰ বাবে প্ৰথম আৰু অতি গুৰুত্বপূর্ণ প্ৰয়োজন। এই নথিপত্ৰ নথকা অৱস্থাত কোনো গাড়ীক ‘সজীৱ’ বা আইনীভাৱে চলন্ত বুলি গণ্য কৰিব নোৱাৰি,” বুলি তেওঁ কয়।
তেওঁ লগতে সতৰ্কবাণী দিয়ে যে এনে গাড়ী যিকোনো দুৰ্ঘটনাত জড়িত হ’লে, তৃতীয় পক্ষৰ ক্ষতিগ্রস্ত ব্যক্তিয়ে চৰকাৰ বা বীমা কোম্পানীৰ পৰা ক্ষতিপূৰণ নাপাবও পাৰে। জ্যেষ্ঠ বিষয়াগৰাকীয়ে গাড়ীৰ মালিকসকলক বকেয়া কৰ পৰিশোধ কৰিবলৈ আৰু ড্ৰাইভিং লাইচেঞ্চ, ফিটনেছ চাৰ্টিফিকেট, অনুমতি পত্ৰ আৰু দূষণ মুক্ত চাৰ্টিফিকেট আদি ততাতৈয়াকৈ নবীকৰণ কৰিবলৈ আহ্বান জনায়।
পৰিবহন বিভাগে বিশেষকৈ বাণিজ্যিক গাড়ী, বহুজাতিক উদ্যোগ আৰু নির্মাণ কোম্পানীসমূহৰ ওপৰত নিৰীক্ষা বৃদ্ধি কৰিছে, যাতে বৈধ নথিপত্ৰ অবিহনে চলন্ত গাড়ীসমূহৰ দ্বাৰা সড়ক সুৰক্ষা উলংঘন নহয়।
