কেবিনেট সচিবালয়ে অৱগত কৰিছে যে আগত ৪ বছৰীয়া সেৱা সমাপ্ত হোৱাৰ পিছত প্ৰাক্তন অগ্নিবীৰসকলৰ পেচাগত উন্নয়নৰ ব্যৱস্থা সমন্বয় কৰাটো এতিয়া কেন্দ্ৰীয় গৃহ মন্ত্ৰণালয়ৰ দায়িত্বত থাকিব। এই সিদ্ধান্তটো ১৯৬১ চনৰ এল’কেছন অৱ বিজনেছ ৰুলছ (কৰ্মবণ্টন বিধি)-ত সংশোধন আনি লোৱা হৈছে।
২০২২ চনৰ জুন মাহত আৰম্ভ হোৱা অগ্নিপথ আঁচনিখনে ১৭.৫ ৰ পৰা ২১ বছৰ বয়সৰ যুৱক-যুৱতীসকলক ৪ বছৰ মেয়াদকালৰ বাবে সেনা, নৌসেনা আৰু বায়ু সেনাত নিযুক্ত কৰে, যাৰ পৰা কেৱল ২৫% লোকক দীঘলীয়া সেৱাৰ বাবে বাচি লোৱা হয়।
এই প্রেক্ষাপটত চৰকাৰে কেন্দ্ৰীয় সশস্ত্ৰ আৰক্ষী বাহিনীত (CAPF) প্ৰাক্তন অগ্নিবীৰসকলৰ বাবে কনষ্টেবল পদৰ ১০% সংৰক্ষণ ৰাখিছে, আৰু তেওঁলোকক নতুনকৈ শাৰীৰিক পৰীক্ষা দিবলগীয়া নহ’ব। কেন্দ্ৰ চৰকাৰৰ বহু সংস্থাই এইসকল প্ৰাক্তন অগ্নিবীৰক চাকৰি আগবঢ়াব বুলি পৰিকল্পনা কৰিছে।
